仙樂都: 2011/04

2011/04/30

"文"族團食事之復活節篇

對上一次成team食飯已經係2個月前喇~ 呢次就趁住復活節, 又咁啱有新老闆上任, 所以就嚟一次"文"族團哂馬lunch! 今次預訂咗公司餐飲部嘅半自助餐, 但由於"文"族團都真係幾多人, 所以有關方面專誠開多日俾我地~ 又借個位嚟係度多謝嗰位同事幫忙安排!!

每位都會獲贈朱朱力復活蛋一隻, oh~~ 我又諗起我啲童年往事......話說當我阿媽拎我去俾保母照顧嗰時(留宿嗰隻), 為咗令我唔好喊得咁勁, 事前都會同我去買朱朱力蛋蛋咖.........好~~ 講返食咗咩先~ 呢度semi-buffet包自助頭盤及甜品, 一客餐湯及3選1主菜

湯係南瓜湯, 細細杯啱啱好~ 可以食多啲頭盤...嘻嘻~~ 個湯最敗筆係面個啲麵包, 睇個樣都知浸到淋哂啦......

頭盤太多, 所以冇影相, 記憶中有3款沙律菜底, 車厘茄, 粟米, Parma ham, 蝦沙律, 煙三文魚, naan bread伴牛油果醬, 薯仔沙律.........okok..我下次一定會影buffet枱, 如果唔俾人鬧的話~~ 講下主菜先~~

呢個係龍鯏柳卷, 日本小姐話幾好! 魚肉唔嚡囉~

牛呀! 文老闆話面頭個啲係 sweet potato chips喎~ 又有同事話啲肉有少少韌......

素菜之選, 什菇意大利飯. 感謝SH太太坐唔同枱都誠意地慢食一步俾我影相~

甜品又係好多, 不過我要戒甜, 所以冇食, 又借咗CC妹妹同日本小姐嗰碟嚟影相~ 奶凍, 黑芝麻布甸, 白兔仔棉花糖 (好可愛呀!!!! 我知我幼稚喇.......) 木糠布甸, 仲有冇影嘅生果盤, 楊枝甘露, 桂花糕, 甘荀蛋糕.......

而我呢.....冇食主菜喎! 呢碟就係我嘅頭盤, 主菜及甜品喇~ 我大約重覆咗呢個組合大慨6次咁到啦~ 嘻嘻.......要一讚呢度個煙三文魚, 因為一啲都唔會過咸!

因為復活節, 同場加影全城搜尋朱朱力復活兔一隻, 又好好彩系俾我team同事搵到喎~~

多謝文老闆請客~~

2011/04/18

節瓜眉豆煲五指毛桃

話說上回探CC妹妹個時買咗唔少藥材, 呢回就試其中一樣五指毛桃質數如何~ 天氣有少少熱, 又有少少濕......係我最討厭嘅天氣! 呢個湯又可以去濕又可以消暑, 唔該俾個like丫~

材料: 淮山, 眉豆, 節瓜, 紅蘿蔔 & 五指毛桃

步驟:

1. 眉豆及五指毛桃洗淨略浸, 淮山洗淨

2. 節瓜及紅蘿蔔去皮洗淨, 切大塊

3. 所有材料放入煲, 下冷水, 水滾起計煲2小時, 搞掂!

2011/04/17

本週午餐

天氣愈嚟愈熱, 公司又愈嚟愈忙, 搞到都唔想煮之餘又冇時間煮......除左有2日食湯渣之外, 都唔知邊得嚟咁富貴食咗3日嘅canteen salad.......睇返先知自己愈食愈齋......同埋我真係好需要有支balsamic囉!

玻璃生菜車厘茄烚蛋雞心豆佐黑醋汁

什菜西蘭花雙份車厘茄烚蛋佐黑醋汁

什菜雙份西蘭花雙份車厘茄佐黑醋汁

由於對balsamic嘅不捨, 所以突發奇想, 就切咗個番石榴落去, 勁好食!!!!!!!!!

大榮華圍村菜

可以放棄工作去一個悠長旅行, 著實唔係咁多人做到, 米芝蓮小姐係少數做到嘅一群, farewell lunch又點少得丫~ 既然你就嚟要去西方國家, 咁就爭取多啲食中國菜嘅時候喇~ 是日選址 - 大榮華圍村菜

我就一次都未嚟過~ 聽日本小姐所講係剛剛裝修完, 全場坐滿之餘, 仲要有長長人龍等位飲茶, 好彩我早一日就book定位啫~~~

叉燒酥; 蘿蔔糕, 煎到好香呀!

釀青椒; 釀茄子; 鳳瓜排骨飯, 用不锈鋼單柄兜上, 好old school呀!

白灼菜心, 蠔油分上

咖哩蘿蔔牛肚

燒賣, 日本小姐: 好食呀! 啲肉係一粒粒唔係挍肉嚟咖! 蒸牛肉, 我分開嗰時feel到好彈, 唔知裡面有冇馬蹄呢?

蝦餃, 大家都見到個皮有幾薄啦~ 不過其中一隻貼住個蒸籠, 搞到唔靚仔喇!

奶黃馬拉糕, 米芝蓮小姐: 好食呀, 呢個好好食呀! 蓮蓉包, 日本小姐擰頭; 鳳爪; 蒜茸蒸鮮魷

甜茶果, 感謝CC妹妹十分好地咬開俾我望下個餡係咩~ 答案係椰絲!

8人飲茶, 7人食野, 15個點心, 埋單三百鬆啲, 灣仔區喎! 唔怪得咁多人嚟食晏啦! 又係咪時候要係呢度搞返個飯局呢?

又, 我真係好愛我呢班同事朋友, 你地對我真係無敵咁好, 講緊係我遲到, 但點心到咗, 有一班人特登唔食住, 好等我影到食物最完整個面! 仲要俾我影完先食.......你地癲咖!!! wakakakakkakaka........

大榮華圍村菜

地址: 灣仔史釗域道1號地下及1樓

電話: 2511 1663

伽倻韓國餐廳

唔知大家多唔多食韓菜呢? 講緊嘅係正宗韓國菜喎! 我記得N年前有段時期成日都去草苑食韓菜, 嗰時淨係知食韓國野仲貴過食日本野~ 如果你係韓燒一族就冇野好講啦~ 其實韓國又點止燒烤肉咁簡單丫, 中國菜都唔係淨止得生炒骨啦! 好喇.....講咗咁耐, 今次拍枱聚餐, 就係好少食lunch食嘅韓國菜; 是日選址 - 伽倻韓國餐廳

炆牛肋骨餐, 睇到W小姐夾落去係肉骨分離, 應該炆得好淋下~

石頭飯餐, 最多菜嘅一個飯, 好健康嘅同時, 大家都有啲膽心WH小姐食完會飯氣攻心好眼瞓~

燒牛肋骨餐, 我發現VT小姐好鍾意"燒"呢個動作, 因為上次食日本野個時, 佢又係牛嚟燒~ 又鍾意食牛, 又鍾意燒! 韓國菜啱哂~

雜錦泡菜豆腐鍋, 石鍋關係, 勁熱! CL太太: 冇肉, 點解叫雜錦呢? 不過啲豆腐又幾滑喎~

午市呢度好忙, 忙到叫佢添茶都叫咗3次, 坐我地對面嗰枱食燒烤呀.....我幾時先可以有咁多閒情食個悠閒嘅lunch呀.........

大家都問, 我食唔食得泡菜呢? 係唔得咖~ 因為唔知佢醃菜嗰時有冇加味精, 所以費事試喇~ 反正我係supermarket搵到冇味精嘅泡菜, 又, 我好想自己整泡菜呀.......

伽倻韓國餐廳

地址: 銅鑼灣羅素街8號6樓

電話: 2838 9550

住家菜

都唔知有幾耐冇同阿媽食Lunch喇~ 今日又托徐醫生嘅大福, 有reason地約咗阿媽食lunch, 是日選址 - 住家菜

午市有2款套餐供應, 一款係午市精選, 有5款餸揀; 另一款係商務午餐, 有50-60款餸揀; 2款套餐都送白飯, 例湯及糖水. 我地4個人就揀左3個午市精選&1個商務午餐

麵醬蒸豬頸肉, 真係好屋企feel下, 有冬菇粒, 蝦米同豆卜; 其實又有幾多人煮呢味會落呢3樣野呢~

鮮腐竹蝦乾浸娃娃菜, 有誠意過好多酒樓嘅雜菜煲!

蒸魚, 呢個係即叫即蒸, 所以要等一陣 (好彩唔係即叫即釣啫~~) 蒸魚係唔應該食到咁大嘅, 呢條啱啱好, 50蚊可以食到一個蒸魚餐, 我覺得好抵囉!

腰果炒素雜錦, 雜錦有素雞, 冬菇, 紅蘿蔔, 西芹; 不過有蒜頭, 食齋就唔好點呢味喇~

甜品係芋頭西米露, 芋頭變哂做茸, 我本人就鍾意有芋頭粒粒, 可以咬下嘛~

呢度午市係人頭位計, 所以我唔食都要叫夠4個, 又, 呢度嘅餸個size都比較細, 有男仔一齊食飯, order多一個都食得哂嘅~

服務唔係唔好, 不過好趕囉~ 未食完就上糖水, 撩緊牙就執碗, 未埋單就抺枱咁囉~ 我知你好想做多轉枱.........所以大家如果要坐底慢慢呢, 呢度唔會係一個好地方囉~

題外話: 我好欣賞今日嘅阿媽, 因為好大方得體, 如果以後係咁就好喇~ 好可能係因為CC妹妹同徐醫氐溝通能力好有關! 我又要再向2位多多學習喇! 多謝2位抽時間幫忙睇我阿媽呀~~

住家菜

地址: 銅鑼灣波斯富街99號利舞臺7樓C&D店

電話: 3105 0339

2011/04/11

大戶屋 (銅鑼灣店)

又..........已經唔知第幾次係呢度陪坐喇~ 好彩呢度menu選擇夠多, 如果唔係我都寫到悶呀.......得到CC妹妹邀請認識新朋友一齊食lunch (絕不是相睇!! 唔該哂!!) 梗係要揀個食物質數唔差, 環境好坐又可以傾到偈嘅地方, 揀呢度都真唔會錯~ 是日選址 - 大戶屋

係幅射污染食物的恐慌之下, 我地依然無懼, 係我角度, 係你咪始終都係你, 唔係你嘅永遠都唔係你~ 邊驚得咁多丫! 講下食咩先~

燒三文魚盒子定食, 見到係半生熟三文魚, 有沙律醬時又有wasabi, 好典型一個西式日本料理定食, 我斷定我係鍾意傳統日本料理!

吉列豬扒滑蛋定食, 唔好以為炸野好乾, 底下啲飯都不知幾多汁~ 多到好似濕過頭.....

呢度最新promotion係午市定食送果汁(濃縮橙汁或罐頭蘋果汁), 紅茶或咖啡一杯.

雖然係第一次識嘅新朋友, 不過都好主動配合我呢個飯前影相嘅怪嗜好, 在此謝過你呀! DS先生! 好高興識到你喎! 信我! 你嘅令西裝加啞面尖頭鞋, 好good! 仲有....你個公事包都幾襯你今日個look~ 你係咪每日都用成個鐘打扮先出街咖? 哈哈~~~

大戶屋

地址: 銅鑼灣羅素街8號3樓

電話: 2573 8333

2011/04/10

敗家誌 (食材篇)

今日去搵CC妹妹學刮痧, 難得嚟上環, 見又係CC妹妹推薦嘅信譽店舖, 就忍唔住敗家喇!

左起: 4両松茸菇, 五指毛桃, 4両生晒淮山其實仲有好多野想買, 好彩銀包得返一百幾十, 如果唔係肯定又鋪滿成個地下咁影咖喇~

霸王花紅蘿蔔眉豆湯

星期日例行公事就係煲湯喇~ 係香港都冇邊日係可以咁悠閒地行街市咖嘛~ 記得幾個星期前, SH太太問我食唔食霸王花, 如果唔係佢問, 我差啲都唔記得呢樣好野~ 是日湯譜 - 霸王花紅蘿蔔眉豆湯

材料就係咁多, 加多2粒蜜棗咁囉~ 不過處理霸王花嗰時, 記得浸軟之後, 要將黃色嘅水全部揸乾, 直至冇黃色水為至, 如果唔係會有苦味咖~

步驟:

1. 霸王花浸軟, 沖洗及揸乾至水沒有黃色

2. 紅蘿蔔洗淨, 滾刀切塊; 眉豆洗淨

3. 將所有材料放入煲, 加冷水煲至滾起, 續煲2小時, 搞掂!

吉野家

香港嘅快餐店開到成行成市, 不過我都好耐冇去過喇~ 而呢一間更加係一次都未入過去~ 今次多得CC妹妹同徐醫生, 我就獻出我嘅第一次喇~ 是日選址 - 吉野家

呢個係徐醫生嘅特盛牛肉飯餐

呢個係CC妹妹嘅和風牛肉飯餐

除咗價錢唔同, size有少少分別之外, 有冇話到俾我聽仲有咩分別呀? 對於一個外星人嚟講, 唔睇過佢個website都真係唔知佢有咁多野賣, 我一直以為佢淨係賣牛肉飯咖咋! 不過選擇多又點丫.....咪又係冇野啱我食........

吉野家

http://www.yoshinoya-hk.com/

Natural Green

係某團購網買到半價優惠卷, 見過2日就到期, 所以今日就諗住換個salad當下午茶~

呢個果盤, 比起唱K收你成舊水嗰啲更加豐富, 除咗睇到嘅生果之外, 其實係青瓜底下仲有哈蜜瓜同蜜瓜, 除咗果盤, 仲買咗支即揸紅菜頭西芹青瓜汁, 埋單半價25蚊~ 都叫幾抵食~ 不過因為人手唔夠, 我等咗差唔多半個鐘呀......如果你係有心去買, 最好都係打電話去訂咗先喇~

係香港好難買到紅菜頭汁飲, 都唔明點解咁健康嘅食物, 依家先係香港開始有多啲人識.....不過仲係買到好鬼貴.......我仲好記得係意大利, 呢啲嘢cheap到爆, 我日日買佢加balsamic當lunch, 又方便又好食.......

Natural Green

地址: 灣仔軒尼詩道311號誌寶大廈地下A1號舖

電話: 2598 9111

豪江豆業

某日同SH太太食完lunch就去咗行灣仔街市~ 行經呢檔豪江豆業, SH太太就話要買返個下午茶~ 佢要咗珍珠豆腐花, 我就要呢個豆花全走~ 食咗2啖先記得影相......呢度個豆腐花唔會好"削", 豆味都唔弱, 我都覺得幾好食, 當然唔可以同我自己整個啲比較啦~

呢度除咗賣豆漿, 豆腐花之外, 仲有賣吓馬蹄糕, 芝麻糕, 紅豆糕等等, 我好耐之前都有食過, 但係太耐都唁記得好唔好食喇~ 反正幾蚊件, 有興趣就咪買嚟試吓囉~ 謝謝SH太太請客! 豪江豆業地址: 灣仔石水渠街

2011/04/03

玉桃苑+Sift Patisserie+松記糖水

屠城之後, 都不離飯局同散水tea........

玉桃苑

呢次飯局唔多開心, 因為好同事CL小姐要走, 略過就算喇....反正都係翻兜的玉桃苑~ 總之就一圍人數14個, 成枱點心不為過~ 提一提, 獅子銀行信用卡有9折!

CL小姐, 你要保重呀~ 得閒記得搵我地食飯呀~ 有事要幫手記得call我地啦~ 仲有, 得閒上嚟呢度update下我地個飲食地圖呀~~~

Sift Patisserie

散水餅, 人地team嘅厚禮, 記錄下就算喇.......真係好唔知點解我好like食muffin, 但係就好唔like食cupcake囉......又係細心位時候, 椰子cupcake同唔知係rose定士多啤梨cupcake中間係有隔住紙, 咁樣就唔會2隻味互相染到喇......依家都真係幾講service喎~~

松記糖水