2010/12/29

是日午餐

天氣真係好乾, 除咗每星期煲一次老火湯之外, 連lunch都好想整啲滋潤嘅食物幫皮膚補下水~ 誠意推介呢個木瓜蕃茄通粉, 補濕之餘又美白~ 用個電飯煲就搞得掂咖喇~




木瓜蕃茄長通粉 (1人份)


材料: 細木瓜1個 蕃茄2個 長通粉隨意
1. 蕃茄洗淨切小塊, 放入電飯煲加少少水, 按煮飯掣, 煮成蕃茄湯.
2. 長通粉加入煲內, 維持煮飯模式, 間中攪拌
3. 木瓜切半去杍, 用羹將木瓜肉刮成茸放入煲內, 煮至通粉al dente即可


Tips:
1. 如果唔想咁杰, 就可以加多啲水, 不過如果加咗木瓜之後先覺得杰呢, 就一定要加熱水, 咁就可以縮短煲嘅時間喇!
2. 呢個湯唔需要加任何調味, 因為木瓜本身已經甜加埋蕃茄嘅酸香, 啱啱好~ 記得係買紅肉較熟嘅木瓜呀!

日本柑

點心時間, fit到漏嘅MC小姐送我2個日本柑, 柑仔比女士們的拳頭還要細, 但又甜又多汁, 好健康的一個下午茶呀~謝謝MC小姐~

(購自citysuper)

有老鼠呀......

公司竟然發現有老鼠, 而偉大嘅LG媽就send咗一封好可愛嘅email俾大家, 呼籲大家注意衛生. email如下圖, 有哂公仔咁, 想唔聽你講都唔得啦~


2010/12/28

感謝詞之聖誕禮物篇

好多謝大家對我嘅愛戴同祝福, 呢一年聖誕係我做人以嚟, 收得最多禮物嘅一個聖誕節. 有見及此, 哂下冷先~

我老闆AC太太, 我真係好感謝你比機會我係呢間公司發展, 我真係做得好開心! 嚟緊我會再努力啲咖喇~ 多謝你!



CM小姐, 似乎你好有心地谷肥我喎~ :P 仲要係酒心.......多謝你呀!!!! 多謝一路睇住小妹, 同你傾計真係好開心呀~


LC姐姐, 一定係LG媽話你聽我好喜歡梅酒啦~ 我要澄清, 我唔係酒鬼嚟咖, OK? 多謝你係我處理文生嘅問題上面俾咁多意見我, 希望以後多多睇住小妹, 多謝哂~ 出去食飯記得帶小妹去見識呀~~


LG媽, 雞翼袖同埋黑夾圍巾係我signture咖~ ok? 呢件黑斗蓬..........超啱我! 因為可以遮埋肚腩, kekekkeke........多謝你! 我好感恩可以識到你, 一齊成為高層同事! 多謝你帶咗咁多正能量俾我~ 希望係過去個半年, 冇帶俾你太多麻煩, 而嚟緊嘅一年, 希望都咁開心! 你一定要笑多啲喎, 因為聽唔到你笑, 我就會好驚咖喇~ (冇相, 因為黑麻麻, 影唔到真身)


RL小姐, 好想點名多謝你~ 你係我識嘅人之中, 你係幾特別! 衣食住行, 吃喝玩樂, 你好似冇咩唔識咁, 多謝你係我無知個時俾意見我, 又無私地分享好物! 多謝哂!!!


冇點名嘅朋友, 我冇唔記得你地咖~~ 多謝哂你地嘅祝福同幫忙.

God bless you!!!

寧波旅港同鄉會

自從上次打完麻雀, 大定都好期待下一次, 於是乎就成就咗呢次嘅雀局加飯局, 又係唔少得西餅, 生果加零食, 而晚飯就安排咗係中環, 是日選址 - 寧波旅港同鄉會




似乎上次大家對Le Salon De The De Joel Robuchon 意猶未盡, 所以今次LC小姐決定翻炒, 仲買埋全港最好食牛角包添! 一打開係勁牛油味! 一咬落係勁酥軟! 牛角包就好得喇! 之於西餅呢.......但係唔知點解今次LC小姐食完之後, 個喉嚨唔多舒服, 應該係用咗啲唔靚嘅糖~ 究竟係我地體質特殊, 定係依家啲化學食品太多呢? 啲唔天然嘅野都係唔啱我咖喇! 好彩LC小姐照顧周到, 買咗好甜嘅泰國金柚, 正呀!

其實我好期待今晚呢次飯局, 話哂要member先食得喎! 又睇下有幾好食?!

前菜2碟, 後面個碟係醃蘿蔔

冷併盤, 肴肉, 醉雞, 薰魚, 個雞會extra有碗肇興酒佐食咖~

依家啲咩糖心蛋呀, 溫泉蛋呀咁hit, 其實係偉大嘅中國烹飪史之內, 一早就已經出現咗啦! 仲要高技巧地要薰煙去做添呀!

賽螃蟹, 由於禽流感, 所以冇加生雞蛋

黃金蝦(去殼), LC小姐點名要食呀! 真係好多鴨蛋黃, 好沙呀!

咸肉津白, 濃油赤醬之下嘅清泉

飽食之選蒸炸銀絲卷各一, 裡面真係一絲絲咖!

啲食物都幾好, 服務都唔錯, 不過就好似唔多夠人手咁, $100一年會費, 可以多個飯堂, 其實都ok嘅!


地址: 中環德己立街2-18號業豐大廈401-405室
電話: 2523 0648

湖舟壽司 小料理

呢排真係好有食神, 又再次能夠試到心水餐廳, 是日選址 - 湖舟壽司 小料理
一入餐廳就見到主理人袖山師傅企咗係料理台, wow~ 呢餐一定好食又物有所值!

先嚟睇下個擺設, 簡單又好細心, 筷子連牙籤, pack得好靚. (唔好意思, 影到爆哂光)

蟹肉魚子海膽定食

海膽魚子香蔥吞拿魚定食





刺身飯配喬麥麵定食, 刺身飯話細都唔細喎! 所有刺身好新鮮, 飯微軟糯帶少少醋甜! 唯獨是甜蛋可以再做好啲. 喬麥麵好彈牙, 夠凍, 唔好睇少啲蔥, 係甜咖, 鮮甜嗰隻!


眾所周知午市唔會食到最最最優質嘅刺身, 不過係呢度, 以每位定食HKD200有呢個質數同服務, 絕對可以翻炒, 值得推介!

湖舟壽司 小料理

地址: 銅鑼灣渣甸街50號渣甸中心10樓

電話: 3580 8928

2010/12/23

Agnes b. le pain grille

好開心呀~ 多得Team lunch, 又有機會一嘗想試好耐嘅餐廳喇! 是日選址 - Agnes b. le pain grille

我地揀咗銅鑼灣店, 裝修都幾有法國味道, 如果再舊多十年就十成似喇~ 因為小妹去過的法國的餐廳, 間間都好舊咖.......好似香港啲冰室咁, 有一種陳年嘅味道........

Set lunch寫係黑板度, 由店員介紹. 頭盤有湯或沙律, 主菜有雞, 魚或牛選擇, 甜品可選芝士, 切餅或是日精選. 每位HKD198+10%, 都幾reasonable price~

一如以住, 我單點Salad, 同事們點Set. 唔理你食咩, 總之法包不可缺, 呢度係配牛油嘅.........唔好話我扮野, 我係法國食過法包配法式芥末汁, wow~ 係要用amazing嚟形容囉~ by the way, 呢度啲包包唔錯~~
我嘅Nicoise salad, 用一個大湯碗盛上, 所有菜好! 新! 鮮! 而且材料豐富, 雜綿沙律菜, 蕃茄, 刀豆, 新薯, 黑橄欖, 蛋, 燒吞拿魚及鯷, 有機會我一定會再食~

又講下同事們個lunch set先~ Tuna tartart, 不失法國菜啲精緻賣相

忌廉蘑菇湯, 有打碎的菇茸掛邊的

主菜魚篇, 魚就冇咩好講, 大家知唔知墊係魚底粉紅色嗰啲係咩呢? 其實係染咗色嘅薯茸. 大家睇下條紅蘿蔔.........好有心地用刀仔整齊地去皮.....
主菜牛篇, 大家都冇expect到lunch set都有完整一大塊嘅牛, 上面綠色嘅係香草油.....唔知係牛油定酸忌廉呢?

其實仲有雞揀, 不過冇同事食雞, 所以冇得影~

甜品可以揀cake, 是日精選同埋cheese platter, 之但係個個都食today special, 唔記得個名, 不過睇樣就知係chocolate cake with vanilla ice-cream, MC小姐一食就知係movenpick, SH先生仲勁, 一睇就知係movenpick, 而我就要聞過先知咩嚟, 我都話我學藝未精咖啦~

由於冇人揀cake, 咁而為咗滿足大家嘅好奇心, 我就影咗cake menu俾大家睇~

餐茶方面同樣精彩, 呢度3杯唔同嘅熱咖啡, 左起順時針, black coffee-->cappuccino-->latte, 我對咖啡冇研究, 俾唔到咩comment, 淨係知唔酸同埋係即磨囉~

呢度近乎所有嘢都印有logo, 睇下連牙籤都有咖.............

呢度啲服務生個個都睇得下, 又幾nice, 服務都唔錯, 連埋食物質數, lunch都值得嚟咖~ 如果有時間, 真係想食完在hea多陣, 因為環境都幾舒服~

Team lunch關係, 謝謝SH先生請客!



地址: 銅鑼灣禮頓道111號地下
電話: 2577 2718

四姐川菜

八八卦卦, 又走去陪坐食lunch, 好彩我班好同事唔介意啫~~ 唔知點解LG媽咁多門路搵食, 是日選址 - 四姐川菜

呢間係私房菜, 不過係開飯網都搵到咖~ 一出lift見到門口掛住好多椒嗰間就係喇~ 入面又梳化又魚缸咁, 真係好home style下咖~~




因為MI小姐唔食辣, 特別點咗唔辣系列, 涼拌苦瓜, 蒜泥拍青瓜, 四川椒鹽蝦, 糖醋里肌

夫妻肺片, 即係牛肚&牛百業, 呢碟食剩咗~

蒜泥白肉, 呢碟清哂~

四川涼麵, LG媽上次食完今次話一定要翻兜, 在坐個個都話好味喎~

重慶辣子雞, 好多辣椒, 感覺上啲雞肉好似好嚡咁.......

水煮魚, 除咗魚之外, 仲有芽菜(勁多)同埋薯粉墊底, LG媽話佢希望啲皮膚有魚咁滑喎~至於辣度係要食完沖涼嘅級別

干煸四季豆, 主要目的應該係叫啲菜平衡吓......

三鮮鍋巴, 上菜嗰時係好似鐵板燒咁, 個姐姐淋啲醬料落去, 好有氣勢咖~

回鍋肉, 一洗罐頭回鍋肉橙色肉的感覺, 但係點解冇荀嘅?

可能食Lunch關係, 連埋我地只有3枱客, 所以上菜速度都幾快, 晚市旺啲就唔知喇, 畢竟都係得一個家庭式廚房~ 所以菜式都幾大碟, 我地呢度每位2百幾, 食唔哂分3盒攞走~ 有興趣食麻辣都值得一試丫~

小妹上一次食麻辣嘅回憶係, N年前爸爸帶我返大陸食麻辣火鍋, 食咗一片用麻辣湯浸過嘅秀珍菇之後, 我就轉軚食返清湯囉~ :P


地址: 灣仔駱克道285-291號高華大廈2樓
電話: 2802 2250

2010/12/18

JW Marriott Hotel - The Lounge

今次係Team lunch係Christmas Special, 由於大家都有食大餐的意欲, 所以是日選址 - JW Marriott Hotel, The Lounge.

其實我係好appreciate呢個buffet係by parts咁收費, 因為個人計好多野唔食, 就算比個full buffet我都冇用~ okok.......大家都知我係會揀沙律, 但係我今次冇揀埋甜品喎(正經地說.....我真係要戒白糖喇!! Please support me~~~)

唔好覺得沙律就好悶喎, 呢個沙律Bar好精彩~ 淨係菜底都有6款, 有我至愛baby spanich (握拳), 之後就係蔬果及乾果配料, 大慨有20款, 如果可以加埋亞枝竹就perfect喇! 咁沙律又唔係淨食菜咁單調, 仲有芝士, 煙三文魚碎, 蝦, 青口做配料, 最後唔少得dressing, 多到試唔哂! 我食咗5大兜!! 飽到行唔郁..........睇下我又max左啲咩~~

我的第一兜, 菜底係baby spanich, 我要俾10個good呀!!!! 蝦, 好爽口; 車厘茄, 超甜; 青口, 一般; 西蘭花及椰菜花, 又凍又勁硬; LC小姐話要用一個對比形式嚟話俾大家聽兜沙律有幾大喎~

呢碟係LC小姐嘅海鮮盤, 可能係近聖誕, 所以午市都有龍蝦~ 翡翠螺好大隻!

我的第二兜, 菜底一樣, 今次加多咗茄乾, 火龍果同黑醋.

呢兜係鮮果加乾果!

呢兜係大蝦鮮果沙律!

甜品counter好細, 有3款蛋糕, 中途冇轉過款, 最特別係呢個得獎蛋糕, 玫瑰白朱古力餅, LC小姐話不愧為得獎作品, 而唔得獎嗰啲試下好喇~

Team lunch關係, 謝謝文老闆請客~~

地址: 金鐘金鐘道88號太古廣場香港JW萬豪酒店大堂
電話: 2810 8366