松屋日本料理

半個月冇update......好懶好懶, 又積左一大堆文要貼......


Happy friday night, 又是小組秘書眾會, 是日選址 - 松屋日本料理(定港式日本料理呢?) 好邪惡既任食呀.....因為好忙咁要不停毀滅啲証物, 所以我冇影相囉......

餐廳是有分時段收費的, 我地book咗6:30pm - 9pm, 一行4人安排到近卡座, 到7點的時候已經開始多人喇! 香港人真係好鍾意任食囉.......

又講下食咗咩先~
刺身: 三文魚 (冇食), 吞拿魚-有筋的! 鱘龍魚-幾好食, 可能因為少食到, 質感和三文魚差不多, 非彈牙魚類, 墨魚-唔係新鮮貨囉! 鮑魚-後悔叫咗! 馬刀貝-落咗單但係冇俾....結論係款式唔多, 求量不求質.

前菜: 有沙律, 不過冇興趣, 冷豆腐-有蕃茄伴隨, 好味, 因為零技巧!

熟食: 枝豆, 又係零技巧......其他冇食唔知

甜品: 有4款味雪糕, 朱古力-CM小姐說不錯, 因為有朱古力碎粒在內, 綠茶-顏色好綠, 味道當然不能跟菓味工匠比啦! 紅豆-真係有紅豆粒粒的! 芝麻-好重芝麻味, 最好食! 一共食咗23球, 超癲! 就係因為咁, 俾人起朵叫做雪糕姐姐喇......(唉....搖頭中)

飲品: 有盒裝鮮綠茶, 不過冇order! 薑茶, 好勁薑味! 還有柑桔茶, 柚子茶等.......+$18有清酒, 但小姐們說如水一般的淡......

全程都好忙, 因為侍應們行過就會順手放低一碟, 唔會有任何提示........即係零服務囉.......加上食物質數.......小姐們食到中段已經發表下次選址一定是非任食類及有優質清酒的正宗日本料理喇.....

松屋日本料理 Matsuya Japanese Restaurant
地址 :銅鑼灣駱克道491-499號京都廣場3樓
電話 : 2136 1271 / 2136 1272