大家樂

對於本地薑快餐店嘅印象係吃不得, 所以呢10年間去快餐店嘅次數比去醫院嘅次數還要少~ 我知! 快餐店係好多人嘅飯堂, 咁我係外星新移民嘛.......fine! today我又八八卦卦咁參加秘書敗家團喇~ 為咗爭取時間幫荷包放血, 快餐係一個好幫手, 是日選址 - 大家樂

窩蛋牛肉飯, 估唔到快餐都整得幾靚喎~ 不過依然好抗拒橙色嘅免治牛肉醬.......

粟米魚柳, 睇個樣都似係龍鯏柳, 不過都唔係好敢肯定, 你知啦.....乜都有假嘢! 又係另一個唔睇唔知, 請留意下係有gravy boat將粟米汁分上咖~ 原來依家快餐都有係擺盤上用心思咖喎! 家還曷其實有咗好耐咖喇? 又, 有冇人知gravy boat中文係咩呀?

肉醬意粉, 其實係咪所有外食嘅肉醬意粉都一定係橙色咖? 唔.....我對錫紙盤嘅肉醬意粉冇好感呀.....

冇留意咁樣一餐大約幾錢, 淨係知好多人, 有好多人等位, 又有好多人自己一個食飯, 環境又好嘈, 如果俾我揀, 我諗我會去翠華........

大家樂

地址: 梗有一間係左近

電話: 打去做咩呀? 玩電話呀?