Kudos @ Dinner Buffet

多得日本小姐升官發財, 慷慨地宴請知情人仕出席晚宴, 本來好開心地係入西貢食海鮮咖, 但係日本幅射關係, 所以轉咗食dinner buffet, 又, 因為呢度近公司之餘又有特別優惠, 所以是日選址 - Kudos

2010年嘅10月我親身嚟食lunch buffet, 印象係無論環境, 服務同食物都係有質數, 事隔半年.......我好慶幸自己夜晚唔食嘢咋! 如果唔係我就成為劣食團其中一位團友喇! 身為路人X, 所以好得閒地影buffet枱, 又好得閒地騷擾人地進食 (雖然平時都係咁........)

海鮮區, 即開生蠔, 開邊龍蝦, 唔起眼青口, 中等大小翡翠螺, 瞓覺蟹, 多膏; 一係生食, 一係烚熟食, 簡單啲, 識入貨同煲水就夠喇~ 2樣我都識喎!

意式火腿區, 日本小姐話老闆生日食個間嘅火腿好食啲!

刺身壽司區, 不明來歷冇標明來源三文魚, 吞拿魚, 仲有黃教授口中嘅爽口八爪魚, 刺身係咁多! 3樣有2樣我係唔食嘅! 食壽司我建議去迴轉壽司店, 起碼可以欣賞師傅握壽司嘅手藝!

沙律區, 沙律菜選擇多, 都幾新鮮; 冇蕃茄? 如果你要求多topping選擇, 建議你去沙律專門店!

前菜芝士區, 你有冇意慾去食嘛?

咖哩區, 雞牛素海鮮齊哂, 芝麻脆卷, 炒飯, naan bread不缺, 據小妹妹所講, 都幾好食~

災區熱盤區, 中式: 冇開蓋蒸籠有燒味, 開蓋睇到嘅叉燒包! 要欣賞酒店方面向外國旅客介紹香港美食, 不過我望勻全場都冇一個外國人~ 中湯, 冇人飲; 西式南瓜湯, 飲完要嘆氣搖頭; 西式: 燒牛肉及炒雜菜, 熱盤完!

即叫慢煮區, 平均等半個鍾就有得食喇! 慢煮嚟講叫快咖喇~ 如果唔係點配合酒店9點鐘要埋單嘅活動呢?

慢煮三文魚, Jamie Olive最近有個節目教人30分鐘煮好一餐, 當中包括三文魚, 我覺得仲好食, 大家不妨參巧下~ 我覺得效果唔會比呢個差囉~

西班牙乳豬, 好唔環保地用咁大隻碟盛起一塊相等於5蚊銀大小嘅乳豬, LG媽所言, 好sucking.

野菌意大利飯, 認真! 全晚最好食!

重災區甜品區, 自己撈珍多冰.......真係估佢唔到! 酒樓式生果併盤(!) 有棉花糖但冇朱朱力噴泉, 連朱朱力醬都冇呀~ 又, 如果你自問會因為由食M牌雪糕, 變咗食HD牌雪糕嘅落差而情緒低落, 奉勸你唔好行近雪糕櫃呀~

劣食團完畢, 多謝日本小姐俾個籍口大家聚一聚, 亦好開心終於都可以約到LG媽再出嚟食飯!! 多謝收看!

Kudos
地址: 銅鑼灣禮頓道8號皇冠假日酒店1樓
電話: 3980 3000