Oceanna

我係外星嘅時候, 都係食菜同生果為生, 最叻就係加多桶乳酪囉~ (我冇打錯, 你亦冇睇錯, 我係一桶桶500g/ml咁食嘅!) 由於天氣愈來愈熱, 所以沙律就成為我嘅頭號至愛, 大條道理食凍嘢喎! 幾好呀! 講咗好多次要試呢間沙律bar, 不過一直未有行動, 就趁住今次同CC妹撐枱腳, 又睇下有幾好食~ 是日選址 - Oceanna

Semi-buffet形式, 4選1主菜加salad及甜品buffet, 亦可以揀light lunch, 即係餐湯加salad及甜品buffet.

平時都唔多食包, 不過今次唔知點解又會食, 仲覺得幾好添, 不過餐廳提供嘅balsamic唔多掂, 有點"拿"喉呀.....

餐湯係冇選擇情況下嘅羅宋湯, CC妹妹話好酸~~

好抱歉地冇影到salad bar, 記憶中有羅馬生菜, 新鮮爽脆; 雜錦沙律菜, 少見地冇食; 粟米紅腰豆雞心豆, 冇食; 車厘茄, 鮮甜, 食咗勁多; 酸青瓜及紅蘿蔔絲, 冇興趣; 薯仔沙律, 加咗sauce所以冇食; 西芹辣椒青蘋果沙律, 估唔到都縛好食喎! 又多一個salad mix idea喇! 烚菜拼盤, 有西蘭花, 椰菜花, 芥蘭, 紅蘿蔔及甜豆; 凍豆腐沙律, 加咗啲炸過嘅紫菜同芝麻; 洋蔥木耳沙律, 最後先出, 已經食唔落喇~ 2款醬汁, 分別有honey mustard & thousands island; 我應該冇背漏咖喇......掌聲唔該!!

呢碟係CC妹妹咖~

呢碟我嘅, 已經唔記得咗重覆呢個combination幾多次喇~

其中一款主菜係海鮮意大利飯, 比想像中多海鮮! (定其實係因為飯少呢?)

以一個light lunch嚟講, 甜品都唔算少咖喇~ 即烘窩夫, 熱就好食咖啦~ 乾果仁蛋糕, 有少少咸咸地; 椰青糕, 太甜; 日式芝士蛋糕, 好食! 啫喱, 冇食~ 木糠布甸, 冇食~ 奶凍, 冇食~ 生果盤(西瓜, 哈密瓜, 菠蘿) 食咗勁多哈密瓜, 都幾甜咖~ 唔知做乜鬼今日又食甜嘢.....唉~~~~

呢度個salad bar都幾啱我, 近公司又唔太貴都係一個好選擇, 係我翻兜之選呀!

Oceanna

地址: 銅鑼灣時代廣場食通天12樓

電話: 2506 3282