一直覺得要係尖沙咀搵間經濟少少嘅酒樓食飯係冇可能, 又唔知點解會俾啲地膽搵到嘅! 是日選址 - 京寶海鮮酒家
下雨嘅一天, 都係唔好周圍走, 所以6:30pm就到咗喇! 又唔知點解咁興唔book位嘅......好彩我早到咋! 7點門口已經出現人龍喇.....可以揀打邊爐同晚飯小菜, 我已經夠烚烚下咖喇......都係食小菜啦~
是日老火湯係野葛菜煲生魚, 冇欺場真係成條生魚俾返你, 仲搭埋豬骨添呀! 有飲嘅話好甜喎......
蔥油脆皮燒雞, 味道一般, 不過皮係脆嘅.
鮮湯竹節苗, 改到咁好聽....其實係魚湯蛤肉通菜苗, 成餐飯唯一的菜~
麵醬生啫魚雲煲, 我聞唔到有麵醬味喎....
薑蔥焗日本冰蠔, 份量好似少咗啲.....
蟲草花蒸多寶魚, 橙啡色一條條嗰啲就係蟲草花喇~ 條魚蒸得幾滑, 唔錯~
奇妙沙拉骨, 其實係京都骨再唧啲沙律醬係面囉.......同平時啲沙拉骨好唔同, 可能就係因為咁而奇妙啦.......以京都骨嚟講, 佢係幾好味嘅~
埋單仲有好甜嘅芝麻糊送, 成餐飯加埋2支大啤$590, 係尖沙咀嚟講都叫經濟啦~
地址: 尖沙咀加拿芬道20號加拿芬廣場2樓
電話: 2301 3638
沒有留言:
發佈留言