大家唔好誤會係街邊大排檔咁有風味喎~ 妹記已經由昔日係市政街市熟食檔搬到依家有自己地舖喇~ 不過地方依然好夠"麻甩", 食物依然好夠鑊氣! 我老豆仲係呢度搵返啲童年回憶添~ 又睇下食咗咩~
西蘭花炒帶子, 睇相可能唔多覺, 其實啲帶子有幾分細隻, 不過可能細隻嫩啲啦......
海鮮什菜粉絲煲, 啲蝦一睇就知係爽咖啦~
豆豉炒聖子, 因為我見唔到椒呢樣物體, 所以佢唔配叫豉椒炒~
京蔥羊肉煲, 姑媽食評 "唔羶喎!" , 但係我見佢食蔥多囉~
鬼馬油炸鬼, 中間釀入墨魚滑, 睇到都熱氣呀~ 夾落去個皮有點硬......唔知叫脆定硬好喇....
雞蛋焗魚腸, 呢個就係令到我老豆encore再order嘅菜式喇~ 又係嘅, 依家香港都冇咩邊幾度地方有得食啲懷舊菜咖喇~ 呢度係即叫即焗, 所以保證新鮮好食~
白粥, 鍾意影相咪影埋囉~
老豆碗啤酒呀~ 食飯前2個鐘就同我講因為咳, 唔飲得咖啡, 真係估唔到2個鐘之後就即刻康復到可以飲啤酒, 神醫託世呀?!尖沙咀嚟講, 應該都冇咩呢啲麻甩食肆咖喇~ 行過不妨試下啦~
沒有留言:
發佈留言