其實煲湯呢, 就冇咩好講, 不過因為美麗葉小姐全家都唔識煲湯, 搞到佢要買湯卷飲街湯, 咁就分享一下我煲湯嘅過程啦~ 不過咁, 因為我唔落肉, 所以少咗將肉汆水呢個程序, 口味清淡啲, 但一樣咁甜咖, 我阿媽初初都話冇肉唔甜, 依家咪又係同我一樣煲素湯~~ 試過你都知咖喇!
我今日係煲山草藥湯, 所以買料一定要去街市嘅山草藥檔買, 超級市場係冇咖, 幾高級幾大間都唔會搵到, OK?
材料超簡單, 就係呢4樣: 土茯苓, 鑽地老鼠, 紅蘿蔔, 蜜棗; 不過買料就有skill喇!
上圖橙紅色嗰片就係土茯苓, 買個時唔好貪靚貪方便, 買去咗皮個啲, 因為去咗皮白雪雪呢, 其實係漂過咖!!!!! 有皮個啲先係正嘢!! 記得叫檔口幫你即時去皮切片, 如果唔係你屋企有斧頭都搞仍唔掂呀~~~ 你睇下我啲土茯苓橙紅色幾新鮮~ 聞落去仲有好香嘅葛味添!!
白啲個片就係鑽地老鼠喇! 你地睇電視多過我, 應該都有睇過阿蘇介紹咖啦~ 我唔多講喇~
唔好以為我又好慳地買呢隻污卒卒紅蘿蔔呀! 其實呢隻係台灣種紅蘿蔔, 甜度比澳洲種高(即係好乾淨嗰啲); 揀啲唔好裂開嘅, 因為裂咗就走氣唔甜咖喇!
步驟:
1. 紅蘿蔔洗淨, 去皮, 滾刀切塊
2. 蜜棗洗淨
3. 土茯苓, 鑽地老鼠"係咁二"沖水, 千祈唔好浸洗或多次清洗, 因為會洗走哂啲味咖~
4. 全部材料冷水放入煲, 當水滾起, 就開始計時煲多3個鐘就得喇! 一定要煲夠3個鐘, 如果唔係會寒涼, 飲咗可能會仲唔舒服咖~
我用電子湯煲, 所以凍水起計, 設定煲嘅時間為4個鐘, 預佢要用1個鐘先滾起嘛.......
煲好就係咁樣, 好熱好多煙, 所以影到白曚曚~ 唔好以為我咁神心留係屋企等佢煲好呀, 其實中途我走咗去北角哨街~~~ 返嚟就搞掂喇~ 由買料至落煲, 應該用咗15分鐘到啦~ 而買料就用咗$40, 買菜嚟講, 已經叫好貴咖喇! 美麗葉小姐, 你又可唔可以講下你用咗幾多錢買湯卷呢? 
沒有留言:
發佈留言