粉葛煲土茯苓

煲湯除咗要夾天氣, 仲要夾體質嘅~ 天氣依然濕濕地, 搞到我依然都係瞓得唔好, 於是呢........好不幸地係下巴位生咗粒大孖瘡囉! 咁就冇計啦~ 又要煲多劑山草藥湯喇~ 是日湯譜 - 粉葛煲土茯苓

白色一舊舊就係粉葛喇~ 平時我係唔會叫檔主幫我去皮咖! 不過今日天氣好好, 所以想快啲去哨街, 就叫檔主去埋皮切塊~ 揀粉葛記得要揀啲頭尾係白白淨嘅先叫正貨! 橙色一片片上次介紹過啦~ 係新鮮土茯苓! 因為舊葛好靚, 所以今次唔加紅蘿蔔都應該夠甜咖喇! 買料至落煲都係用咗15分鐘咋.....噢! 我真係懶中之霸......貴就係貴啲, 大拿拿用咗25蚊去買料咖~~ 不過我講緊一煲湯囉! 好抵好抵~~~

唔知大家有冇飲過一啲好黏口嘅葛湯呢? 我就唔鍾意咁黏嘅口感, 想要啲湯口感爽身啲呢, 咁就要係清洗粉葛個時, 開住水喉用水沖耐啲, 沖到啲水由白色變返透明就得喇~ 咁樣做係因為葛本身澱粉質好高, 澱粉溶係水之中就會令酊湯變杰, 而用水不停沖出嚟白色個啲就係葛嘅澱粉, 沖走哂佢咪冇咁多澱粉, 個湯就冇咁黏啦! 記住係沖水沖耐啲, 唔係浸水浸耐啲!

步驟:

1. 將粉葛及土茯苓沖洗乾淨.

2. 蜜棗洗淨切半 (容易出味啲)

3. 凍水落料, 水滾起計煲3個鐘頭就飲得喇! (我未水滾, 所以較4個鐘)

下期預告: 連續煲咗2個星期山草藥湯, 都係時候轉轉口味, 下星期煲返果菜湯, 等大家有得食又有得飲啦~