繼續土茯苓......

好憫呀!!!!!! 已經連續3個星期瞓得好差喇!!! 成日都半夜起身, 一唔係就2個鐘頭醒一次.....算點先, 我冇參加鐵人耐力賽喎! 仲要冇啦啦係眉頭生暗瘡......(下刪一萬字)

好喇好喇.....有暗瘡又瞓得唔好, 個人又火火地, 最好都係煲下土茯苓去濕清毒, 而粉葛又可以去骨火, 一煲湯解決我2個問題, good呀! 嚟緊呢個星期都會有雨, 所以加埋赤小豆幫助去濕, 是日湯譜 - 鮮土茯苓煲粉葛赤小豆

上次都有分享過買料要注意事項, 今次就分享下點處理材料啦~ 買粉葛最好就梗係叫個菜檔幫你去埋皮啦, 唔洗煩嘛~ 不過有時唔係即買即煲, 預先去皮氧化哂就唔係幾好~ 粉葛唔同紅蘿蔔, 唔係直條冇線條, 用蔬菜刨去皮好易刨到手咖~ 所以係撕皮 (見下圖) 由頂開始用刀扁起少少皮就可以一路撕咖喇~ 超簡單! 因為複雜嘢我唔識做~

去咗皮白雪雪~~ 建議大家切咗一件件之後先一次過沖水~

赤小豆用水浸泡令豆殼軟化, 可以快啲出味~

步驟:

1. 粉葛去皮切塊, 然後沖水洗淨; 赤小豆用水浸泡一陣

2. 土茯苓輕微沖水; 蜜棗洗淨切半

3. 赤小豆隔去水份洗淨, 連同所有材料放入煲內再落水

4. 水滾起計煲3小時, 搞掂!