仙樂都: 順德漁鮮酒家

上午11點35分同我講lunch六位飲茶, 地點我揀, 好彩我平時都有2手準備, 就決定帶大家去一間又經濟又真係食食物嘅酒樓, 反正大家都係自己人, 都唔講咩裝修咖啦~ 是日選址 - 順德漁鮮酒家

(其實上次係時代廣場飲茶已經想嚟呢間咖喇.....)

雖然位於遊客區銅鑼灣, 但店家係一般街坊酒樓格局, 冇考究人少要唔要搭枱, 不過我地6個人就坐咗張大枱直至走都冇人過嚟坐喎! 點心都係即叫即蒸, 所以落單後都等咗15分鐘(or更耐)先有得食. 不過見到點心上枱時出哂煙, 新鮮熱辣辣就好開心囉!

順時針左起: 馬拉糕, 我都好鐘意呢個, 可惜佢唔係邊位~ 叉燒包大大個都係小點, JL先生話好抵食! 南瓜豆沙煎軟餅, 細心地每件都剪開一半, 連唔鐘意食南瓜嘅JL先生都食成件呀!

順時針左起: 順德煎魚餅, 夾落去已經feel到好彈, 不過日本小姐話咁樣即係溝得多粉喎. 鮮蝦時菜餃, 完隻鮮蝦+椰菜餡, 好聰明嘅做法, 因為椰菜唔會變黃. 咖哩魷魚, 唔似其他酒樓咁用油浸住, 幾好~ 豉椒鳳爪, 日本小姐欣賞佢唔會深色到係好似染色咁囉! (好熱好多煙, 所以影到白曚曚)

左: 燒賣, 黃教授: 好好食喎! 日本小姐分析, 豬肉係冇攪碎, 又有冬菇又有蝦, 真係幾唔錯呀! 右:雞札, 好開心見返小時候嘅雞札呀! (大叫ing) 餡料有炸魚肚, 細個叫呢個做綿花, 搶住要食嘅! 火煺條, 冬菇及雞件, 如果佢係改用淮山而唔係用腐皮, 咁呢個就成為最終極old school點心喇!